出海

昨天很特別，跟聖雅各藝想的師傅仔還有其他會員一起去西貢海藝術節和地質公園。

藝想係一個智障和自閉譜系人士組成的陶藝工作室，我哋叫呢班藝術家做師傅仔，佢哋好多都做咗五年十年陶瓷，並且以藝術作為終生事業，參與過國際的大型藝術展覽。

總覺得要跟他們出遊是極之困難的事！昨天的天和海都十分之美，而且竟然有近六十個師傅仔、會員和他們的家人一起出海，真係極之罕有的事。

去年西貢海藝術節，我跟這班師傅仔一起做了十件陶瓷，散落在橋咀島上的行山徑。

十件陶瓷都是啟發自島上的大自然，來自這片山和海，實的動植物故事，叫做《大菠蘿遊》是去年九件藝術品的其中一組，而今年第二年的藝術節，亦都有新嘅島同埋好多新嘅藝術品呢。

我哋之前做的十件陶瓷都依然喺橋咀的山巒上，經過咗十號風球同埋黑雨，有辛苦的工作人員每個月去檢查和修補。 

而今年，我哋仲同公眾朋友一齊，做咗新嘅mini-ceramics, 新的ceramics 在往來西貢的小船、小食亭、火山探知館和information kiosk 裡都可以找到，大家可以去尋尋寶，找找他們。

我哋都幫今年嘅extension work 改咗個新名，就係《大菠蘿遊. 出海》喇！

如果你未聽過藝想的話，邀請你哋去島上透過他們雙手創作的作品認識他們啊，亦可以去灣仔石水渠街他們的展館找他們的作品。

好多人可能認為佢哋係殘障嘅一群，需要社會幫助；

好多人會問，藝想嘅師傅仔做咗咁耐陶瓷「有乜嘢改變」

卻不會反問一下「我哋睇到佢哋做嘅作品，有無改變咗我哋點睇社會上呢群智障或自閉譜系的朋友」

藝想一直相信，其實幫助唔係單向的，佢哋都有好多嘢可以啟發，同埋教識我哋。

我同藝想亦都喺日本一個類似的藝術祭，隔空相遇過。

然後一直合作。

睇返上年的blog post 先記起，上年藝術節未開始前，大家都有好多擔憂，例如話啲遊人會唔會坐上去，掛住打咭唔理背後嘅故事，整爛佢咁，什至偷咗佢咁。

有人什至言之鑿鑿話，我哋嘅藝術品唔可能survive more than a week. 當時，在郊野公園內放藝術品也是第一次，有關方面一直很擔心會有負評。好彩無發生以上嘅事，大家都過咗好開心嘅第一年。

估唔到咁就過咗一年！

昨天另一件好特別的事，是收到池哥的木造椅，池哥& Friends 過去幾星期都在另一個島鹽田梓開了一個好大的田中木workshop，好厲害，簡直係living art piece, 我當日睇住佢哋由零set up 呢個室外工作室的，所有東西都由外邊以船運來，包括木桌子、据木工具，木條；都已經好瘋狂；但還可以有個超靚的帳幕、收音機都有手造木殼的，太神奇。

今年比去年有更多島有藝術品，那些島本身都好靚。

我覺得喺這一類藝術節，藝術都係作為媒界，去讓大家重新回到偏遠的村落大地，重新同大自然連結 - 行山、看海、偷聽村民分享的故事、游海、看石頭... 

啊，今年我都會帶三個workshop!!!! 應該係一年之中最特別嘅workshops, 上年都有嘅喺行山徑上講故事，看師傅仔的創作，左右兩邊都是藍藍閃閃的大海；

今年，還有另一個要齊齊穿成恐龍行山看陶瓷的工作坊 XD!!! 

比較少連自己都覺得興奮同搞笑嘅工作坊。

高島

現在回想周五，彷彿已經是很遙遠以前的事！

那天我在改地圖，嘗試做運動，他就整天在上班，時間好像過得好慢。

周六早上我又跟他一起去了糧船灣，是連續第二個周六去為藝術節作準備，那天早上我還有點後悔，天氣有點熱，而且我還有好多工作未做完，但應承了就一定要去喇。而且我又想，去深山中做手作不就是對於工作狂如我最佳的放空meditation 嗎？

現在回想起來卻是十分之美好的一天，縛了不少結，然後我們就去了走路，試試walkie talkie, 糧船灣在未有萬宜水庫前是一個島的其中一部份，上次我獨自走路上了萬宜水庫路 M012， 這次Mavis 大隊長上去了，怎麼她不派我去，路程不長但全是上斜的，也許這就是Mavis 吧，但好彩她沒有派我去，因為她遇上蛇！！！這才是這天最memorable 的事。

這天一到達就見到hattrick 的大隊長比我們先到，已經在藝術品旁的椅子上拿着laptop 工作, 那是被廣闊的山和水環抱, middle of nowhere 的地方，十分之搞笑。

糧船灣的感覺跟別的地方很不同，第二年藝術節除了去年的橋咀和鹽田梓，還會加開兩個新地方，分別是糧船灣和滘西洲。

糧船灣這裡有三件新藝術品，分別在荒廢小學校的海邊籃球場、漂亮的涌口和海鮮店那邊的村公所。

我和康就走了一遍去試試walkie talkie, 啊！對，糧船灣是一個 「電話收唔島」

這裡真的很寧靜，好內海，之前一口大魚送貨日也是畫把東西以大船送到這裡然後轉到小浮台船上，工人們再要下水把東西拉往沙灘上，十分之不容易，再要沿小路推上山。

我們這兩次都要坐快艇，本來四十分鐘的船程變成十五分鐘，但卻是尖叫之旅！

不是人人能承受。

回程時海上很多船，海膽哥還表演切過別人的浪，好刺激吓，我咁唔驚水都覺得咁刺激，其他人點諗。

我們去了朋友仔niko 的site, 那裡海鮮飯店的婆婆好可愛，後灘極之美，像玻璃pudding, 幸好阿康叫我落水玩，我小時候總會怕玩完海水要搞好耐先乾返，but no, it's not that bad at all, 我還播了海水聲給半小時以外那條村的朋友們聽。

那裡有個廢堡寫住海膽養殖場。

沿路風景也很美。海水清徹見底。

結果也真的要工作至四點才完，無論是昨天做藝術品還是今天去聽talk , 我都覺得我總是好易累，除了畫畫之外，我感覺自己好難一直坐着single-task, 就算畫畫我也要聽住audiobook /podcasts.. 

晚上我們都很累了，回家吃小火鍋，食得很飽，還有好多crispy salad vegetable, 怎料第二天 4:30 am 我的medical machine 就沒藥了，我很戥他可憐，他放假都一早醒了，不是四點半，是八點半，but still, 我明明叮囑他要睡到十二點... -_-" 因為他一整周都在外邊，不是準備藝術節就是開會。

記得他以前總說自己很易累，而我給人的感覺/錯覺就是很多energy, 現在他大概可以認清事實，我只是用三個小時就了別人九個小時的工作量，其實他比我高energy 好多。

所以，我一早就要回家換藥，也游了水，然後我們就約回在九龍城喝咖啡，去了一間久仰大名的文青小店，我還是覺得，也許我是老了，因為還是在家最好（也是老了才有自己舒服的家）那是一家很多古道具的店，叫了的東西全都是他吃和喝了，因為成份問題，我點了的最終沒有食。 

我萬千叮囑他不用把我的那份都食完，但他還是全部都食完，後來他才說因為不想浪費，我也有這個習慣，但近年已經慢慢學會，這樣子對自己不好，偶然若果點錯了，其實也不一定要把食物食完。

九龍城的街道變了好多，就像好多人說，會在自己的城市裡homesick, 這個話題已經接近討厭，因為說得太多太多了，而且經常十分之binary, 別處這樣，香港這樣....anyway

我們去了阿逵老師的 exhibition, 展出了好多畫，也有講座，超級多人，包括見山整個大家庭，sabel, 師兄，阿貴，阿浩，梓祺，華欣, sharon，也碰到好多朋友。

以前聽阿逵老師的interview 聽不懂他說什麼，現在我明白多了，覺得真的很開闊思想的，真的真的。

已經很累了，我的生活還是很多chaotic 的部份（i mean 對別人來說可能已經好有系統，井井有條，可能因為我係上昇星座處女座，暗啞底瘋狂OCD schedule/ 張枱/食乜嘢/幾時做運動，都好想好有系統井井有條，當然那是瘋狂的）

畫畫是整理思想

寫日記也是整理思想。

因為一起的時間十分之開心，總是想中間可以放一星期假staycation 才夠

既然不可以，那就只好把不好玩的部份都盡量變成享受（例如是睡覺和做運動 Wa....)

暴雨

一口暴雨大魚

上次要出海已經好驚，今次竟然係暴風中出海。

想起上次一口大魚小草攰得要躲在一角食donut, 但今次不可以了。

昨天是東北季候風的日子，下着冷冰冰的雨，有些地區陣風更強如打八號風的時候，不要以為這樣子就可以休息了，我們要如期開節的。

「好大壓力呀」三隻小動物高呼。

運送藝術品的工作人員們依然要出海！

很擔心他們會掉下海呢！

去年大家都說起，這也是做藝術節很困難的一部份吧，有些位置不能把船泊到碼頭，於是就要先用大船運至附近，然後再爬到一個四邊沒有欄杆的浮台上，還要把藝術品都搬到這浮台上 - 鋼架呀、ceramics 呀...

我們不是真的要爬下去吧.... 連人類可能心裡都有點害怕

除了波濤洶湧的大海這個factor, 苗苗竟然有點優勢

他根本不用爬ladder, 就能準確地跳下去，但也不要得戚得太早

在大海中漂浮對他們來說還是很可怕的，他們不斷顫抖

「我們要不要下去幫他們手？」卻仍懂得問（真係好有家教的小朋友）

的確他們為人家加重了浮台的重量，但當然只有offer, 無實際落去幫手

還是濕了腳

想起以前在越後妻有大地藝術祭的日子，我們都要跟藝術家一起掃地挖泥洞，大部分都不是什麼有趣的工作，大家在一天過後總會埋怨全身蚊叮，腫得要用當地老人做的蛇酒，或者是舉起手油天花板一整天.... 或者是清理四周的藝術品... 不過對於某些人例如我們來說，參與過程才是最藝術的部份呢。

「一口大魚」這個operation 要每天進行的，跟工作人員把藝術品的組件運到各島上。同場加影昨天在另一個島，藝術家跟朋友們一起在島上set up 造木工作坊，未來數周的作戰場地。

後記：想起上年的藝術節，我們也在地圖上輕輕紀錄了整個創作過程，跟不同人商討呀，怎樣得到靈感，怎樣跟師傅仔溝通和創作，要留點時間讓藝術品乾起來才可以入窯，還有就是要把木頭和幾十公斤重的cearmics 搬到山中，安裝在行山徑不同位置，而我們只是去年九件藝術品其中一件。今年我們畫「一口大魚」「明日暴雨大魚」看到新一年的藝術品從籌備到現在開始要安裝，真的是很不容易的事呢。

總覺得這種making of 是好神奇的，沒有人紀錄的話，就有一部份珍費的過程失落了。一件戶外的藝術品還真的是有好多好多人的參與呢。

山居

怎麼覺得這個星期做了很多很多事

今天早上窗外風景好像長野的山或者是nepal 的山，好不真實。

他家的貓好黏人，全身白色的，共有四個黑點。

我好像有點流鼻水，他以為我哭了，早知我騙他我是餓得哭了（講笑）

他專程走遠了買咖啡給我，真不好意思。

感覺好像過了一個很長的周末，還是因為之前一周都一面忙又斷斷續續地花了好多愉快的時光，例如是一起起床去吃早餐喇，他就要上班。

坐巴士時他告訴我上班的事。

例如是有天早上去完西貢後，晚上不舒服，不過我叫他千萬不要這麼遠來找我，他卻說what if 他已經在巴士上 >.< 太瘋狂

周六早上的陽光好燦爛，我們在粢飯店外坐 40 號小巴，就像我們中學時一般。

我的中學校園不止很美，而且是「我的」花了五年十分美麗的時光，forming years of life, 每天看着赤柱灣的內海和日落，在暴雨天跑往飯堂，雖然是dormitory head girl 卻常常晚飯差點遲到被罰企，放學後我們會圍住east wing west wing 散步讀書。

進校園的路每年speech day 左右就會掛滿聖誕燈，好漂亮，在那brutalist 的天台會有garden party before the ceremony, 不看那brutalism 書的sharing, 都不知道那個鐘上面有architect 的簽名，太神奇。

然後又去了小教堂，原來小教堂annex building 是這麼漂亮的，一邊是木窗框，另一邊是十分之靚的鐵窗框，令人想起carlo scarpa 的details. 現在回到中學，覺得中學變細了，不過我們還未去prep sch 和赤柱軍人墳場，都是十分之漂亮的。或者要等冬天吧。

我們去了那間十分之漂亮，又常常要排長隊的海邊餐廳，粉紅色的牆，還有好味的三文魚，竟然不用排隊，好開心。之後還竟然去了赤柱正灘游水！！！

感覺不知不覺仲可以游埋水！

然後就回了家休息，才去看電影 - Past Lives, 很好看呀，不是那種有什麼情節好厲害的，是那種看完會一直思考一段時間的電影。這樣子的故事能拍成電影更加美好。

在他的家看了些十分十分之好看的書！！！

果然，別人家的書都會很好看的。

内藤廣的人生故事好正，唔記得影低中間好多好正嘅句子。

另外幾本是關於打造夢想麵包屋的那個建築師，記得幾年前我們傾海角車站時也提起過！連裡面啲sketch 都好靚。

他問我係咪好耐無睇過archi 書 haha 

頑強

米版日記

「睇佢個樣應該唔止八歲」獸醫說
「佢唔病時完全唔同樣的，除咗充滿活力，成個樣都唔同，好似得三四歲咁」人類媽媽說。
這段對話出現過不止一次，我每次都偷笑。

五月二十二日 - 荃灣海濱公園
突然被拋棄在街上一段日子了。
我的肚子好痛，身體一天一天衰弱，不能再躲起來。
無論多攰多病，沒有貓想被人一手抱起，更何況我是獅子座的，太沒有尊嚴，雖然我瘦得皮包骨，還是把那女孩一腳踢開。

晚一點，有另一個姐姐拿出罐罐來，我一世都不會忘記那聲音。
她說從未見過貓仔咁瘦，給我吃了很多... 然後一手把我抱了回家。

她家裡還有五隻貓貓，可怕啊。
她把我送往獸醫，現在我知道這地方多恐怖，每次都被人用粗粗的針插進前臂。
不過，那裡有吃有喝，而我好快就精神起來。
救我來到這裡的Meg ，每天下班都來探我。
也對住我哭，不要哭吧，我說。你帶我回家不就可以喇？

住了整個星期醫院。
然後，我就坐的士來到上環.... 
唔止搵到個暫託家，仲搵到份工，勁嘢。
(下次再寫）

------------------------------------------------------------------------

你離開後的....... 日子
每早起來，第一件事就想起米米。

小小的貓咪，瘦瘦的身軀
卻有着頑強的生命力。

回想當日，就咁聽rescuer 求助，聽她的病況，未見過她真身時，大概有少少覺得「點解咁差仲要救」會唔會係人太過固執嗰類。
而且她有FeLV, 果然很多天都沒有機構收她，求助人急得隔住電話就哭了，啊，Sarah 也是自動送上門的，我當義工咁多年，身邊可以暫託領養嘅朋友quota 已經用晒。
一切都是很好的緣份。

然而，我親身去荃灣的醫院探她時，那時已經過了一周，不要看她只有 2.2 kg, 果然是一隻充滿生命力的貓。不停在擦醫院小籠的門，只想人摸，只想人餵她才對。

而如果放返佢出去，佢係一定死硬。
但講真都真係要有位有人湊先得。每收一隻動物都真係要小心考慮：
------------------------------------------------------------------------
可能大家見到我哋dog cat centre 唔係咁多貓狗，但工作量已經好大好大，可以consistently 來到嘅義工亦都有限，背後統籌工作由intake, 到adopt out 都好多好多.  

而所有呢啲工作都係義工做的, LAP 是沒有一個paid staff 的。

我哋亦都只係靠有心人/個體一分一毫捐錢，沒有大機構或政府每月支持。

你可能覺得大啲啲嘅機構，social media 咁多人follow, 要籌錢都易很多，的確會係，但當我哋平均每月都湊緊幾百隻貓狗，要籌嘅錢就變得好多，如果普通個案只係睇醫生打針（運送等等）係四位數字，而當中有好多個案好似Mia 咁亦都會係五位數字，每個月只係動物們睇醫生，起碼都要六位數字，if not more. 

而centre 所見以外，還有好多動物喺暫託家庭 foster, 現在 LAP 待家中的貓狗至少二百幾隻 .....

但 每- 一 - 日都仲有好多貓狗求助，要找家。
上周四間AFCD 都問我哋可唔可以收貓和收狗..... 只係幾日裡面等緊收嘅狗（當中包括好多棄養，總共有十幾隻）
愛可能無限，但空間、人手和錢不是無限。
有啲平日，成個中心只得一個義工，要walk 晒所有狗，清晒所有房，仲要千祈唔好有intake 喎... 一有intake 可能好多隻狗，要沖涼又要搬來搬去，來到可能全身都係嘔吐物和屎尿。

有時啲人好似覺得charity 只收容易找家的動物，近日還有人對我說，好驚訝我哋會收成人貓...
什麼？
好似「中心已經很滿了」是一句謊言。

不過reality 就係
你睇下貓中心
有半癱嘅
有好驚青所以等咗成年嘅
天生無眼皮嘅
天生有皮膚問題的
10 歲嘅ciara
13 歲嘅細b
口炎嘅
要好多錢醫嘅
有嚴重又醫唔到FeLV 嘅
好多又貴又長時間醫要打441 FIP 針嘅，仲有好多好多

BB, 又純種嗰啲，當然好快turnover, 被人領養了。
不過LAP 唔係一個狗場貓場，我哋嘅focus 係rehoming, 覺得佢哋只係中心唔會係最開心，唔係求其有瓦遮頭就係好。

終極係可以幫到佢哋找到好好嘅家。
不過好似見山嘅post 話齋，我哋好細，我哋只能do so much, but we keep doing
------------------------------------------------------------------------

講返Mia 寶寶，她吃東西時用盡全力撞個碗，心急得好像一千日沒有吃東西了。

她是不怕事的獅子座。
她是一個大食妹. 
（三天吃完了一整包 3.5 oz stella & chewy's. 我都唔敢話俾人聽）

有諗過寫個故事叫「我家有個大食妹」
你以為她胖得走不動嗎？
她比蜻蜓飛得還高。

把她搬來我房的小房後，跟她更加親密，她房間溫度也舒服多了。有一張湖水綠色的工作枱，掛住蜻蜓，力力的羽毛玩具，房中還有小房。
有粉紅色軟軟的床，還有一個她好喜歡的貓抓板。
換來了香香的貓厠所。
我會唱歌給她聽。
每次我入她的房間，坐在她前面，她就用頭對着我的額頭。
一切都好舒服，可以一直住一段時間。

大家都好像對她好放心，有人問她是不是一直長肉。
但其實我每天看她，又沒有覺得好樂觀，有段日子她總是痾爛屎，有時很累，有些日子吃得不多，然後還有嘔的日子。有些日子不肯定針有沒有打到，有些日子她還是小便太多了。
希望你短暫在世的日子有快樂。

我不敢看她那天的驗血報告，其實很大部份已經回到很好的狀態，不是因為太差不敢看，是因為她已經有很大進步而不敢看。

內疚和自責的感覺依然很強烈。
覺得自己沒有早點帶她去醫院無比的笨。
雖然沒有早知。

所有愛動物的主人，在動物離世後都仍能記得他們毛髮的質感，他們的眼神，他們的輪廓，每個位置的斑紋和顏色。

我又想起她這麼難找暫託的一隻貓，都遇到不同人出了這麼多錢和愛去幫她。
有人寄補充品，有人寄食物，有人給她買漂亮的衣服和厠所，有人關愛她，問候她... 帶她睇醫生，幫她每天兩次打針驗血... 

米米，我們很愛你。
時間有限但愛無限。我還有好多故事未講俾你聽。
但謝謝你來過我們的生命裡，真的如Meg 所說，是一件很美好的事
你是一隻性格好獨特的貓兒。

的確，一切都是最好的。

------------------------------------------------------------------------

畢業

Mia 昨晚離開了我們。

老實說真的很傷心好難受，
她不久前還那麼精靈，佢個人咁有個性咁獨特。
雖然知道唔應該咁諗，但不斷覺得我做得不夠好 :’(

五點起床見到3 am miss 咗幾個醫院嘅call 就知道了，簡直係最大嘅惡夢，類似嘅事, 我已經唔係第一次遇上。

之前完全無諗過 Mia 即晚會死，佢當時情況唔係差成咁。
大家都話佢會無事嘅。
仲話要等佢出院來探佢。

醫生話佢昨晚on fluid etc. 本來都好啲，仲自己食嘢飲水同企起身行，但半夜突然就呼吸急促... 可能DKA 令佢血液好酸，內臟衰竭，或者係已經上咗腦；又或者佢本身有FeLV 免疫系統差，又瘦，或者有啲我哋唔知嘅炎症等等.....

因為當義工，我不時遇上病貓病狗，通常睇住佢哋decline，覺得自己盡咗力，俾咗最好嘅時間、醫療照顧佢哋，最後真係唔得喇，都有少少戥佢哋解脫的感覺。

但今次竟然覺得有啲內疚，不斷覺得自己唔夠小心。
我個人平時好少會咁。
哭了很多眼淚，眼睛都痛了。
今早跟Sarah 一起去看她的遺體。
咁辛苦養返靚佢啲毛毛。

明明我哋話佢起碼會可以活到xmas, 到時會肥返啲。
但最後仲短命過淋巴癌的Alex, 耳朵腫瘤的Cotton....

當然其他人，人人都覺得我唔應該內疚唔應該自責，但都不斷諗點解我唔早啲帶佢去睇醫生 >.<

但理性啲睇，呢件事就算唔係呢一刻發生，或者遲啲都會有一次catch 唔到，以為係stomach ulcer, pancreatitis 定乜.......
而且dka 真係一樣sudden rapid onset 嘅嘢 ......

但我依然好掛住佢喺門後面叫嘅聲同埋眼神。
諗起佢好鍾意去hi 人腳邊，想人摸佢塊面。

諗起佢殺蜻蜓的衝勁。

諗起幫佢驗血打針。

依然會諗會唔會只係一場夢。

Mia's birthday is on 2nd August, originally
我同靜琪（？）傾好咗係二號唔係一號，
佢一定係獅子座。
但依家就變咗係佢funeral 。

不過學我個朋友話齋，呢個世界係無早知，亦無可能catch 晒每一個細節

我擔心佢最後幾十個鐘肚會好痛好唔舒服，
miss 咗佢求助嘅signs,
擔心佢去到醫院傷心寂寞住咁死。
佢會唔會覺得我哋又帶佢去醫院，佢又要再被遺棄....

我諗起呢段日子，因為佢會四五點肚餓，所以自己一定訓少咗好多，尤其有時嗰晚夜返夜訓，但現在想來，被她嘈醒是一種幸福來的。

如果起身時聽到佢叫（無死到）係一件好好嘅事，見到佢想食嘢係一件好好嘅事。

我朋友上個月咪生咗個BB ，然後個bb 意外地有大嘅complications, 兩日後死咗，佢一定好傷心好傷心，當時我諗好多人明明一生一切都好好，事業家庭等等，人又好，但因為一件大嘅traumatic 的事，可能顛覆晒一切，令佢哋陷入depression, 忘記晒所有好事。

雖然我同Mia 呢個問題細好多，但可能我呢一刻都係被呢種guilt 蒙蔽咗過去兩個月嘅好。

動物嘅生命實在太短暫，但佢哋嘅好真係好absolute

諗起有啲人覺得我/sarah 好好，每日都有人遺棄自己病咗嘅貓狗，有啲人湊落話太大壓力了，但我自細都覺得，願意open your heart 去分享你有嘅resoources, 嘅人，去幫其他人，其實自己都會benefit greatly, 會connnect 到其他好人，會對自己生命有更大反思等等。

我因為Mia join 咗兩個好勁嘅support group, 學咗好多嘢。

亦都識咗新嘅朋友，好無私好愛貓的rescuer Meg, 更加認識Sarah, 本來都知佢好勁好好，但呢兩個月對佢嘅聰明、冷靜、同埋同理心有咗新嘅體會。
仲有好多好多朋友都沿路給了很多支持。仲更認識咗好多onebiters😅

我都好謝謝LAP 願意收佢，LAP 咁多年讓我看見，雖然係一分一毫去fundraise 的charity, 但為咗動物真係出心出錢出力，如果必要時，要睇貴嘅醫生都會睇，佢哋要死都會去陪住佢。

我不時聽到求助人話，我哋係唯一一個覆佢哋嘅charity : (

愛同錢唔同，愛係無限的，唔會因為俾咗出來會少咗。

Mia 間房雖然係我（無用的）厠所來的，但有獨特的香味。
又有好多好多人送嘅禮物，漂亮的貓砂盤，粉紅色的床，超香的雞肉，蜻蜓，supplement，她喜歡的貓抓板，彩虹玩具還很鮮色，還在轉動的automatic feeder每兩小時還在轉。

收到好多好多好朋友的關心問候，好多人都話唔會忘記佢捉蜻蜓個樣 >.<

至少我知道佢呢兩個月都係開心的。

She was partially unfortunate, but partially very very lucky. Shining with glitters of humanity, if it were something visible.
好像力力, Rosie 一樣，去到天堂，眼睛和身體都閃亮住曾經被深愛過的光芒。

閃閃

Edit/ she passed away at 3 am 26/7 😣

當我以為自己已經為FeLV+ DM 的 Mia 做到最好，勤力地早晚驗血，打針，睇實佢，陪住佢，餵最好嘅嘢俾佢食，佢竟然都可以喺從街上被救回的兩個月內hypo 又DKA, 兩樣都有即時生命危險。

什至令我覺得近乎係personal failure, 呢個情況都好罕有，我湊過咁多貓狗，就算有啲善終嘅，都好少會有咁嘅感覺，通常覺得盡咗力就可以。

湊Mia 嘅日子，令我有好多反思。

會諗長期病嘅小動物小朋友，
係咪真係會明白你做嘅嘢係為佢好呢？
定佢寧願短命啲快啲死算。

幾年前我都好似Mia 咁試過DKA, 嘔咗成晚，我絕對覺得自己係食物中毒加PMS, 點知朝早去到醫院時，等都唔使等。

啲人成日話咩急症室要等六個鐘八個鐘，我直接就被人送咗入ICU.... 住咗五日，所有人都話，你知唔知好危險，會死㗎。
有次我同K 醫生提起我呢次意外，佢就同同枱啲人話「你差啲見唔到佢㗎喇」

Mia 如果唔死嘅話，都要起碼住五日。好貴好貴。
好想佢可以得到細心溫柔嘅對待，同埋好起來。

>.< 頭先獸醫護士話，啱啱呢幾日，有另一個cat case, 係DKA 死咗
i was so shocked, 雖然啲人成日講到咁嚴重，
但我實際上無聽過人係咁死的。

我係嗰啲好少亂喊嘅堅強寶寶，但都流咗好多眼淚。

Mia好可能係曾經因為病，而被人遺棄出街的，佢可能從來無諗過有人（我哋）會咁想佢可以活長一啲，過多啲好嘅日子。

佢一路上真係遇到好多好多好愛佢嘅人，出錢出力，什至佢有十分之傳染性高的傳染病，都願意take her in to foster，寄雞肉俾佢，買玩具俾佢...

如果人性的光煇是閃閃發亮的碎片，在她身上會是披着這樣的一件外衣。
希望佢無事啦。

其實因為佢有FeLV，又咁瘦，唔止係DM, 我一直都唔敢太樂觀，我每次樂觀就會出問題, 尋日先講起希望by 聖誕 佢會肥返啲啲 >.<
不過，湊病人病動物就係咁。

I thought I did everything to ensure the best for FeLV+/DM Mia, which we rescued 2 months ago from the street, very skinny.
Learnt to test her BG morning and night, do injections, gave her the best food…

Almost felt like a personal failure, which is very rare for me. most of the time just felt like, as long as we tried our best, is ok, taking care of Mia led me to many reflections, e.g.

- Sometimes I feel frustrated when rescuers think we MUST take these very hard cases, but do they know how expensive and hard it is to care for her?

- How do we know if a life is worth saving, but she has so much good vibe, energy and love…….

- do they really know that we are giving her all these injection and blood check for her gd, just like chronically ill kids, I mean would they rather die instead?
And many more…..

The nurse told me just this week, another DKA cat patient didn't make it.

I also DKA a few years ago, vomited many times, I thought I had food poisoning, nth 2 bad, by the time I went to, A&E, they took me to ICU directly, no need cat 1, 2, 3, 4…….

Mia will need to stay a few days too if all is well….
V expensive of coz, but not just me, shes blessed with so much love since the day she’s rescued.

Shes partially unfortunate, but partially very lucky. Shining with glitters of humanity, if its sth visible.

米米

分享下啲frustration, 感動故事同埋seaside studio 打風日常

記得幾個星期前，我都曾經己"Mia 呢幾日病咗"來開始一個post, 但前兩日佢又病，而且今次仲嚴重好多。

好像就算你已經花好多時間，所有東西都做足了，但還是不斷會有新問題，在你最意想不到時出現。

一開始我們忙於找一個啱嘅打針dosage, 等佢唔好高同低嘅trend 咁drastic... 搞咗好耐，覺得都算好咗啲，跟住又肚痾咗好多日，又試過感冒.. 

In between 每日都仲要擔心會唔會打多咗針，打少咗，仲要每日幫佢驗血.. 

到終於肥返啲, 竟然幾日前開始嘔，嘔本來唔係啲乜嘢大事，但加上佢本來嘅病，又DM, 又FeLV, 又貧血，又可能係胰臟炎，唔肯定係邊樣嘢令佢嘔，如果係DKA 或者係貧血嘅嘔，除時都會有生命危險，而且我未見過佢個樣咁病咁呆，平日佢極之諸事八卦。咁如果係以上嘅原因嘔，都仲好，如果係其他額外嘅原因.... -_-" 

又遇上颱風，想攞藥都唔得。

Reminds me of 身為病人的frustration, 有好多嘢係控制以外，又好多嘢，唔係你做到最好就會有應有嘅效果。

想起病人的英文係Patient, 呢個字既有智慧又ironic. 

----------------------------------------------------------------

Mia 嘔咗兩日，由有嘢食一直嘔到水同泡，有晚 mia 無食嘢，我無幫佢打針，佢嘔咗八次，我擔心佢hypo, or 脫水 潛意識諗住每兩個鐘睇下佢，跟住真係十二點，兩點、四點同埋六點醒咗（我不嬲都有呢個驚人的"super power" ）
所以基本上一生都無用過alarm clock
我自己都覺得驚人，因為我無用任何willpower 我樂意一覺訓天光
但我覺得都即係暗啞底係緊張
所以我唔係嗰啲輕易訓到隻豬咁嘅人

好掛住Mia 有活力同開心嘅樣。

我又喺颱風日，做咗件好奇怪嘅減壓活動：

客人/工作伙伴想我畫地圖上一間舖頭做sample, 但我開始咗忍唔住畫咗成幅地圖........ 

我諗畫畫尤其係畫地圖真係好紓壓.... 

今朝五點幾醒咗，理性話俾我聽應該訓耐啲（因為尋晚十二點先訓）但忍唔住想繼續畫...... 

畫地圖好迷.... 

之前提過，因為湊Mia, 湊Alex, Rosie etc. 因為不同的病貓狗，入過不同的online support group, 今次Mia 那兩個超勁，個group 裡面好多專業advisor, 又因為DM 同e.g. cancer 唔同，需要立刻的decisions... 

啲人好responsive, 好supportive, 好多好多information, 基本上呢個international group 都好值得study, 佢哋set up 嘅documents, 好勁。我喺身為一個人類chronic illness 病人都無遇過啲咁勁嘅support group : O 可能係我見識淺薄。

另外，都不時會見到啲人講起自己嘅貓貓來到生命的終結了，昨天就見到一個post, 話自己由2017 七月開始，每天都在月曆上mark 低早和晚幫貓貓打針的記號，以防打多了，但今天早上將會是最後一次寫這個記號了。

雖然他很傷心，但打算一直留在這個support group, 因為這裡曾經給了他們很大的支援和希望，初初發現貓貓有病時，他很害怕自己會唔小心傷害到隻貓，擔心自己生活永遠不再一樣，永遠不能再去旅行。

這個群組的朋友們應承他一開始是會比較難，會一直好起來。

結果真的是這樣。

後來貓貓還有thyroid cancer, 和其他兩個心臟問題，但都活到二十一歲四個月！！！！

他因為很感恩這個群組給他的support, 所以希望之後都能留在群組中，幫助其他病貓爸媽。

好感動呀。

仲有好多好感動的。

生日

六年前的今天，三隻又瘦又細嘅喵喵來到地球上，佢哋雖然係唐貓，但唔知點解一家被困在一個後巷籠裡，當時正值夏天，四處又有蚤又熱又下雨，幾經辛苦長大到兩三個月大，就遇上了颱風，然後成個身體都濕透了。幸好，有好心人救咗佢哋一家。就係喵喵同佢嘅兄弟和妹妹喇，當時佢哋都好病，而且瘦得整排肋骨都看得見，周身都是跳蚤，又低溫，又感冒。

看牙齒有三個月，但體重只得一個月大。

要是無人暫託佢哋就必然會死了。

當時所有有經驗的暫託家庭都已經正在湊住好多貓狗，所以義工就竟然打電話我，一個從未湊過奶B 的新foster form, 就係咁我就遇上喵一家和LAP. 

親身認識了好多以前只是略有聽聞的事。

以前在家樓下散步，聽狗友說繁殖場會在poodle bb 未滿月就幫媽媽開刀拎bb 出嚟，因為人人都鍾意細size 狗，未足月加餓下佢就會細了。
當時我不以為意，心諗世上有無咁多變態嘅人呀。而且本來就唔鍾意poodle, 所以沒有很上心，但當了義工之後就親手觸及到許多這樣子的case.... 又有繁殖場的媽媽的肚皮滿是傷痕，傷到發炎流膿就丟去獸醫處不接了。

在我認識LAP 前，也像很多人一樣，只想要某一種品種的狗，所以填foster form 時其實是想暫託一隻柴犬，怎料第一個收到的電話卻是問我可否foster 貓BB，而且連相片都沒有，兩個鐘內立刻就要去接。

幸好，我不知怎地就去了接牠，才會遇到之後好多美好的和可怕的事。

當義工比我的工作辛苦幾十倍，我有時跟朋友呻「好真係好唔想做義工或者是LAP 的工作了，因為真的好辛苦，要跟好多人聯絡，大家有好多要求，明明之前講好咗，之後又會變；如果我幫忙找暫託，隻狗去到別人家出現了什麼痾蟲，或者係徹夜大哭，什至係散步走失，或者係唔知係咪病咁，也要貼身湊住個暫託家庭。

但呢啲都唔係最難，最難係面對世界對動物嘅誤解，對charity 嘅assumptions/misunderstandings, 而所導致嘅更多傷害，對無辜小動物的傷害。

例如那天說，有些人會選擇購買因為覺得動物領養中心的動物全是traumatised 或者係disabled； 

或者係啲人選擇購買，因為覺得容易啲，但其實呢個係一條生命呀，如果charity reject 你，會唔會諗下可能你真係唔夠時間喺屋企，我哋經常見到主人唔夠時間喺屋企，然後隻狗喺屋企大破壞，及大叫，最後就被主人棄養；去買一隻寵物，商家當然最想就是你付出那幾萬元來買，不會告訴你這些，所以容易啲。

又或者可能係你只係想adopt 某種純種貓狗BB，咁當然好多人都想，而只有一家人會得到那隻動物，所以你就被reject 了，其實也不一定是針對你的。

暫託並領養了喵喵之後，我就去LAP 當義工，當時聽義工們說，這裡所有人都是義工，沒有paid staff, 我十分之驚訝，覺得怎麼可能，365日開門的shelter 可以全由義工運作，六年下來，當然之前過程是如何困難重重的，但也因為大家都是喜愛動物，一個極之大的common goal, 這些義工才可以年復一年，每周每天，在工作、湊仔、等以外去當值。

但在LAP 的日子，最令我感動的卻是看到好多動物仔的生存奇蹟，和LAP 的義工們對動物的不離不棄。

這是確切地改變了我的。

以前我大概覺得某啲病嘅人或動物，要用咁多資源去醫治，或者對那生物來說都是痛苦的，或者人道毀滅了好一點。

在LAP的日子，我卻看見義工們，如何會傾盡金錢和時間去幫助一些有剛在街上救回來的動物，她們也許徹夜無眠地餵藥餵奶，為了那隻動物學懂打針驗血，那可不是他們自己養了十幾年，家中的寶貝。

他們都會每天去探住院的動物，抵住風雨去救牠們，每次有動物真的抵不住，要離世了，也會特地陪伴在側，不讓牠們在最後一刻獨自死去。

有啲人會話，佢哋只係貓只係狗呀。

這些要花錢花力去救的動物，有好多好多真係奇蹟地回過來，變成別人家中的瑰寶，那天就聽領養人calvin 在說，真的不只是我們「救」了動物，動物也救了他，在他生命很struggle 的日子，給他無限安慰與陪伴。

在暫託喵喵前，我還在見psyc 和CP, 當然他不是改變一切的only factor, 但我還是覺得去接牠們那天是一個生命中的分水嶺。看回頭都是閃閃發光的日子。

我總覺得苗的粉紅腩腩就像我心臟的一部份。

p.s. meow 也跟我的好朋友同一天生日。
p.p.s 苗雖然好年輕，但也不是一直健康，幾年前也做過手術，病了很久，希望他以後會很健康吧。

小暑

Mia 除咗出名瘦，就係出名大食，睇佢大細，估計本來應該有雙倍重量，唔知經歷咗啲乜嘢，輾轉流落街頭，Mia 嘅瘦相比Alex （力力）cancer臨死前的瘦有過之而無不及。湊力力剛好是一年前的現在呀，暑天的貓。 Mia 同Alex 都分別有傳染性病毒而不適合跟其他貓一起生活，所以就有自己一間房了。大家可能以為喵對有新貓來會大反應啲，但其實每次都係小草大反應啲，佢太痴我，我每入去貓的房，佢就瘋狂扭計。

講返Mia, 第一個獸醫話佢每日應該食三包糧左右，後來，第二個獸醫提議任佢食到覺得飽為止，而我同Sarah 又想到用分段feeder. 

 佢初初hypo 出院後，來到我家，一日食到六包糧。

一直我哋都嘗試找pattern, 找最好的餵食時間，打針的dosage 和次數，但事實証明有時真係無得plan 咁多，佢尋日就突然間無胃口...... 啲屎仲越來越runny, 腦裡轉了幾十種可能性；但半夜見佢仲好呆，跟平日經常大叫，跳高跳低的她判若兩貓......  

半夜見佢訓喺平日唔訓嘅床，又唔郁咁，仲嘔咗兩次，真係好擔心 >.< 
放低咗嘅嘢食都無食...... 差啲今日要帶佢返獸醫，但點知佢今日又好活躍，帶咗蜻蜓俾佢玩，以為佢淨係對食有興趣，唔會想捕獵，但佢極之鍾意，完全唔放過蜻蜓玩具。

捕獵嘅佢有一副「唔會俾隻蜻蜓返生」的決心，隻蜻蜓一飛就要捉。都好，做下運動。

另外，佢似乎鍾意自己拆開啲嘢食，多過已經放咗喺碗嘅嘢食，好搞笑。

我今晚同嚟緊幾日都要外出呢，好彩每次都止係兩三個鐘，都有啲擔心佢會突然BG drop 呢個係最大嘅擔心... 因為可以喺好短時間內發生。至少今日見佢咁活躍都無咁擔心....... 

剛剛見到周日早上游水比賽的相, 也是仲夏的美，閃閃光的世界，真係好開心。

唔明點解有啲咁好玩嘅嘢 

好想反轉身就跌返落水，要畫吓呢個景象先得。因為成日都好想反身跌返落海。

希望盡快有時間再畫下Mia, 畫埋另一個故事最後兩頁，畫下海，同埋畫下樹木 <3 

草稿

「每幅畫都係下一幅畫的草稿」

我近日對呢句說話有特別深的體會

我們也許慣於花好多時間畫草稿、諗構圖、思考 overall flow, 諗諗諗 諗，反覆諗

但畫咗落真嗰張紙先發覺 

- 呢隻藍好似仲差啲

- 原來呢個大細嘅紙會畫得主角隻眼唔夠細緻

-  呢個大細時候顏料厚度會有限制

（而我畫咗咁多年畫對呢啲嘢都有一定嘅感覺，但都依然好多時畫咗先有新發現）

咁就再畫過喇，第二次又會好啲，知道第一次有乜嘢做得未夠好。

所以無得心急... 無得慳... 

我經常見到繪本班的學生，好多人寫嘢都好ok, 而且好多同學都寫自己的deep personal experience, 起碼是真摯的經歷和情感，不會太差，什至有好感動的。但我發現好多同學完全唔習慣用圖象思考，或者習慣對住一啲嘢畫，或者只是想着如何畫返自己文字寫過的.... 

不過呢啲思考方式都係可以慢慢培養的吧。

之前兩天做了好多事.....（諗起都唔係兩天，或者可以改為兩年....) 

我時不時將一周的 to-do list breakdown。越忙的時候，畫緊幾本書、做緊幾個project、 教緊班、同時做運輸，就要把工作break down 得越仔細，咁就唔使開始個task 之前又諗一次，要由邊度開始呢？例如其中一個task 係聽日要畫書裡面其中兩頁，咁就要之前諗好咗係乜嘢角度，邊個spread, 紙都要cut 好先，如果唔係望住個to-do list 又會由頭諗一次我今日畫乜嘢好呢.... 什至開始又再構思。 

另外兩個喺繁忙中之可以做嘢efficient 啲嘅方法就係

1.  leverage 一日最精神最productive 的時間，我自細讀書都係咁，因為我係morning person，就係朝早十一點前嗰幾個鐘，就算讀書的日子，主要都係靠嗰幾個鐘做嘢，下晝就可以休息、玩、見人、見朋友、上堂... 所以... 其實我唔係啲人想像中做咁多個鐘嘢 : O 坐喺度一日嘅人對我來說先係匪夷所思。

2. 藝術老師請我們想自己人生最愛做的五件事 - 例如是畫畫、游水、大提琴、動物、寫字咁..... 佢話，其次熱愛的四樣嘢，全部都係幫緊你做你最愛嗰樣嘢，又或者話 ，其實五樣嘢都係互相「幫助」的，我都一直覺得係咁呀。同埋「幫助」係好wide-spectrum 的定義。好似如果你係做創作，每日唔游水散步，可能好快physically 會筋膜炎，但emotionally 停下來的時間都係好重要的，而且，好多創意都來自那個pause 的時間。 

3. 訓得好食得好都好緊要。

4. 我仲有另一個習慣令自己開始畫畫時可以立刻進入畫畫的狀態，係聽podcast !!! 

跟住，我就覺得自己都幾適合寫self-help 書，雖然我好唔鍾意嗰啲書，擺明我嘅方法未必啱你，每個人都應該探索自己嘅方法！！！

不過聰明地勤力, 一定的discipline 應該都係走唔甩嘅嘢。同埋做自己鍾意嘅嘢根本完全唔會辛苦，唔會唔想起身返工（只會好想好想起身返工）

有朋友提議我做一個hand-drawn invoice 展，笑死。

我話啲人只會對啲銀碼有興趣，她說「打格仔」呀

另類打格仔。

有不止一個朋友問要買幾多嘢先有呢啲invoice/receipt 😆😆😆🦎🐛

呢啲就無喇，但 parallel space 同埋 M+ 的平行展覽就快開始喇。

有好靚的 limited art prints, 地圖umbrella (外邊是深綠色的）
original maps....... 都幾罕有㗎... 星期五開始喇! 

船貓

我近日咪做緊一個personal project 嘅.... 同大家分享下，其實都係整理我腦中的東西的一部份。

平日真係好少有機會做呢樣嘢，因為好幸運地年年都好忙，有啲project 要畫成百幅畫，中間仲有其他地圖要畫、有班要教，要preppp and hold workshop etc. etc. 

其實依家都係..... 夾硬逼啲時間出來做.... 

但畫繪本係我 最 最 最 愛

我呢本書啲圖畫咪repetitively 對比船貓的carefree, 和人類的趕忙嘅，得七十隻字，好少

 好多人類日常生活成日忙住覆message, 趕住去下一個興趣班，趕住連接的巴士，一分鐘都唔可以浪費..... 

貓當然不會這樣，雖然他都打霧捉老鼠，但一天睡十八小時

但書去到最後有一次........ 

連 船 貓 都 煩 惱 起 來，想要打出完美的霧 ，有點像做蛋糕meringue 時要有peak 的white cream, 你要明白那是極之abnormal 的事，船貓平日只係曬太陽、搗亂、被愛，一年只係工作幾日...他的工作就像人們打咖啡一樣打海霧。

原來.............

圖像：那是愛他的船員叔叔生日的日子，他徹夜工作，想整個維港海面打成一個大蛋糕/貼海的霧only - 只有三四月生日嘅人才有機會

第二頁係visual surprise as dark turn into light n harbour full of perfect sea fog

可能最尾有嚿生咗腳嘅雲行入船艙送蛋糕俾佢哋

文字：但一年煩惱一次好了

我要努力畫埋嗰啲船貓打霧嘅場景先得

我好鍾意海霧，有時家中窗外都有，但發現好多香港人係唔知道香港春天不時有咁靚的海霧的(THANKS to my photographer friends!) 

畫一本（好嘅）書真係好艱鉅

其實畫一本唔好嘅書，只係畫晒咁多幅畫都已經好艱鉅。

啲畫仲唔一定一take 過呢。

寫嘅過程，要用咁少字同圖畫，講到所有嘢，都係要用好多時間反覆思考。

還可以認真點，花多點時間去研究每個角色，每個場景，不同畫法等等呢。

同埋我有時未畫出來，如果只係以文字present, 其實對方未必一定想像到我個腦裡面嘅影像係點，所以我一定要畫咗一啲先可以同人分享。一面畫都仲會有好多新想法。

近日學ceramics 同藝術課真係好開心，nothing is wasted，小小的training, daily exercise 和反思goes a LONGGGGG way 

我又諗起我哋嘅藝術老師話：「唔使覺得畫一幅畫要咁緊張、小心, 你最多畫衰咗幅畫，所以可以試多啲，唔使咁就住，畫壞咗幅畫係一樣你totally 負擔得起嘅嘢，所以有時可能要你畫花幅畫，well if you don’t try something out of your comfort zone, you never know what it’d be like…」

Prelude (what’s the word in books…) 

//在中環碼頭工作的晚上，人們趁船來之前買一杯酒，可能我是貓吧，又可能我是一個陌生人，人們特別容易打開心窗，說起上班的煩惱，生活的鬱悶，也會說到世界大事，股市，失戀，升職等事。

我把他們的說話都一一放進膠袋裡，趁船開前最後一刻，沿甲板斜道跑上船。

把那些說話倒進打泡機，打成一束一束海霧。

人人都甘心變成一嚿雲//

奏鳴

我咪喺一間中學做緊一個校內地圖展嘅，今日有一個open to public 的sharing. 

所有冒雨來的人都是天使來的，can't thank them enough, 還有人帶埋小小朋友從大嶼山來。

那不是一場普通的雨，就在sharing 前一小時，雨下成河，電話閃着「要下冰雹」的警告。

我介紹了自己的工作 -  是一個地圖和繪本創作人。不過不時聽到人話唔知點介紹我，因為覺得我同時做好多嘢，例如係Dear Tree同埋係動物義工咁。自小就好喜歡繪本，又好想以好的故事（文字和圖畫）讓平日被忽視的東西都能夠得到聲音。

因為今次嘅展覽主要係手繪地圖，所以講咗少少點解世上有google earth, 鉅細無遺，自己仲會畫咁多香港不同區的地圖。

志堅副校長made a very kind and nice 回應，他自己是作者，曾經創作過香港每一區的地境文學。不論以文字還是繪畫/地圖的方式創作，其實都包含了對城市的看法。

我們談到大家對旺角的印象，談到也斯《吉澳的雲》人們去看吉澳的人，吉澳的老人卻整天不動地看着吉澳的雲。每次聽到人說文學中的香港, 都覺得好fascinating. 也談到Walter Benjamin 現代化下的靈魂

啊！忘了說，這次展覽其中一個highlight 係文學，and I'm always fascinated by that too，好像兩年前創作過的筲箕灣和北角文學地圖，裡面紀載了香港文學中出現過的筲箕灣和北角，曾經是小上海的北角，張愛玲初來港時都住過； 〈家住春秧街〉詩中的春秧街街市，說春秧街彷如「舊時代的一截尾巴」；還有〈鯉魚門的霧〉中的筲箕灣... 

然後志堅校長講到點解呢間津校裡面，會做咗一個咁嘅展覽空間的部份都好感動。雖然我IG 寫過，但我相信親身聽一次係唔同啲。

他是爸爸，也在中文大學講課，又係中學副校，又係作者, seee

世上係充滿呢啲又勤力，又有vision，又瘋狂的人。

這個在校內的展覽位置本來是塊空地爛地，還有點臭味。他覺得十分之浪費，跟人相討該把它變成什麼好呢？

有人提議變做「未來課室」吧，聽來好好，但那是什麼？

「放一些最新型號的電腦？」那不是電腦室嗎？

而且過一年，新電腦都變舊電腦。

最後成為了藝文空間，藝術才是timeless 呀. 文學、音樂都係藝術 btw. 

志堅副校長和視藝科老師Alma 和其他同事們，一手一腳自己學着interior design 把這個空間打造出來。琴也是找二手的。

現在，他們不時會邀請作家、藝術家交流，做展覽，玻璃現在全都手寫滿西西和何福仁的詩。

而室外的牆也投射了不同的詩。

學生經常入去呢個space 彈琴飲咖啡，木台上的玻璃寫着「大部分的煩惱，只要養貓就會好」- 村上春樹

及「除鞋走上去，你就是貓」

副校覺得好多年輕人出去art gallery 睇畫可能睇得十五分鐘都唔知自己睇咗乜，更加有好多小朋友唔會行入畫廊，所以想reverse 呢個experience, 把藝術帶到校內一個好像cafe 的space, 然後也一邊有工作坊，讓小朋友有immersive experience.

這間都是一般津貼學校，不是什麼國際學校老牌名校那些。

一講俾身邊嘅人聽，我教社區地圖班嘅故事呀，呢啲學校中靚靚圖書館，啲人就問係唔係某某國際學校，某某創意學校。

他用了一個字，就是invent了這個空間出來。

有出席的朋友之後message 我說「這個地方太Amazing了，其實我進入這個藝文空間後，有一段時間，完全忘記了自己在一間中學，直到蓉蓉問這是band幾學校的時候，我才發現自己在一間中學，真係好Amazing」

好感謝這班老師的努力。

謝謝喜歡我的地圖的朋友們。

死啦，啲人話我啲caption 越寫越長....... 

滿瀉

滿溢

昨天朝早游水畫畫，出去上藝術課（好像在法國藝術大學的大師課）晚上要教三個鐘頭班，但in between all this 仲處理緊Eamon 狗狗的事，他最後離世了，我完全無時間process 呢件事，整天都好full (not in terms of work hours, but the amount of emotions, inspirations, density etc.)

昨晚是另一個繪本班同學分享自己so far 的故事，他們的課長達八個月，現在去到一半左右，好多同學都寫了完整的文稿，but even if they don't it's ok. 我已經大致睇過聽過各個同學的故事，今晚係佢哋第一次於全班面前分享。而在此之前，他們已經跟不同老師上了一系列繪本、畫畫、寫作課。

你知繪本班不嬲好易有好感動的事..... 

每一屆都好深刻好美好。但昨晚真係有啲爆。

有同學創作關於兒時爸爸患癌症的事，他只是寫實地寫，但已經好感動，後來他經歷十分抑鬱的瀕死時刻，現在自己也成了爸爸和哀傷輔導的社工。他說自己好吃力咁嘗試把故事寫得fun 啲短啲，但我覺得無需要咁做。 

有一個同學寫有人trapped in childhood trauma, but actually memory is faulty, and we can imagine ourselves in another way

有不止一個同學講到喊，自細被逼用右手，但其實左手寫字； 已經做到大學教授，但站在大學講台仍會想起媽媽把聲話佢廢柴； 

有同學寫自家貓貓患絕症，家人唔明點解佢要堅持養佢，湊佢，點解唔將佢安樂死算，最後她自己也患了絕症，媽媽很用力照顧她，才明白點解個女當初無放棄隻貓。有嫲嫲嘅回憶 ，公屋的回憶.... 

我哋都話，兩個白髮同學嘅故事最fun 最窩心，那是打從內心的，唔知係咪去到嗰個歲數無乜煩惱了？也有不止一個同學的很有創意，很有詩意。那些我都十分之喜歡。

但最爆係 乜嘢呀🥲🥲🥲🥲😭😭😭😭😭

我不嬲知有個男同學想創作自己在兒童醫院工作的日常。

但昨天竟然present 了另一個故事....
係佢自細病嘅故事 : O
本來每組五個人present 完，大家先一次過回應，
我忍唔住 問佢 「呢個係咪你個人經歷」
因為我同你有同一個病 :O 
i mean it's not the rarest on earth, 但喺同一個班咁近距離真係好少好少好少.

我們班中其中一個同學是做廣告的，她說自己一生諗過不少橋，拍過好多故事，但聽完大家今晚的分享，好感動，亦知道自己條橋一定唔掂 ，因為個個同學嘅都係個人故事，切膚之痛，有血有淚的。

有一個同學講爸爸的車房(through 佢對手的）都好感動

雖然佢曾經睇唔起爸爸嘅工作，人哋爸爸着西裝；而佢爸爸係爛地自己搭的車房, can't even 唧起架車，隻手因為長年摸chemical 又黑又乾...
p.s. 白髮莉莉讀白髮盈盈的詩好sweet

我覺得自己好幸運好幸運，得到大家的信任, 聽到大家的寶貴的故事。

而昨天下午就是我自己當學生，上藝術課，老師也是作家也是畫家也是電影美指，平日沒有教人只教藝想..... 

我們上課其實是談天，人為什麼會畫畫？
點解啲人會話一幅畫靚？
因為畫得似畫得真？
因為audience 自己睇得明？
咁同去聽完orchestra 然後講得出呢part 係piano 有乜嘢分別呢 ？

畫畫係一個不斷認識和探索自己的過程，跟文字思考不同。文字有其restrictive 的時候，也許是這樣所以我們畫畫？

我們在街上以炭枝速寫路上的人，炭枝練習不是一個技術上的訓練，而是跟工具的磨合，對所用的工具的呵護，不呵護就會斷喇。

他希望我們每天都要畫三十分鐘「唔係一星期上堂嗰日畫一次，我寧願你其餘六天畫，上堂那天不畫」

用炭枝畫畫好像人家磨墨，你估嗰啲磨墨嘅人唔知世上有一樽樽的墨嗎？但那個過程是warm up 也是思考。
還有我的好同學貴善與titiamos! 詩意的化身。和我們的師兄，一個畫畫法系的小朋友。

講返Eamon 我哋當然都希望佢會有五年十年, or else 當初唔會用十幾萬幫佢做手術。我昨天趕住出去教繪本班，同ICU nurse 講電話都仲匆匆忙忙... >.< 

我覺得佢嘅照顧者都好自責，不停問我點解會咁，係咪做錯咗啲乜，但病就係咁，無原因，俾你知道原因都無用。

他的情況有三個可能
1）移除了整個耳道但周邊還有發炎
2） 腦炎（之前咁多年都有咁多發炎/箘在耳中/太近腦）
3） brain tumour

成日聽同學嘅故事、喺animal rescue 日子遇到嘅動物，都提醒我哋 cherishing the present 的重要性，so cliche, but real. <3 

wish we all have a love-filled day

萬難

排除萬難讀書會

有些人不是認識了很久，但在離別時都會傷感 😢 

星期四繪本班昨晚是最後一課，十一月開班時已有兩個同學說，臨離開香港時的心願是上繪本班，做一本繪本，可能是給自己的禮物（在我看來，好多人嘗試創作都係 self-healing, 疏理自己的感覺的） 

昨晚的課在德慧，其中一個同學要早走，但都專程來；另一個同學遲來，因為周日就一家大細要離開香港了，可想而知係會幾混亂，幾忙，cut bills, pack 箱，同幾十年朋友家人say good bye, 準備之後去到的logistics....諗起都癲，仲要唔係自己一個係一家大細.

所以每想到他昨晚都來就眼熱了。

他後來告訴我「本來都掙扎要不要來，但太太說叫我今晚上堂啦，上完你就會好開心嫁啦。今晚的確很開心」🥲🥲🥲🥲

不是客套說話，其他同學都很開心見到他，有同學的IG story  說「實不相瞞，我都想做KK 俠個女」 

大家都常說他是溫柔爸爸. 

這幾個月我們一起閱讀不同possibilities of 繪本，一起去木棉樹出版社聽雅文精彩的分享；
我們又花了兩個晚上在佐敦唐樓樓梯間探險，找舊商場中的裁縫為KK 俠補衣服，尼泊爾姨姨商店化身人物數數字，也有康文署logo 人夜晚出走... 鬧市飛索、機舖被拒記.... 

每一屆的同學dynamics 都好不同。
我很喜歡這個班是small(er) class, 可以有點(更)坦誠一點的分享，因為創作總是會觸及自己十分之vulnerable 的部份。我覺得這班也很不同，好多同學仔都係感性、溫柔又感情細膩，見到唔止一pair 同學成為好朋友。

呢班同以前嘅班最唔同嘅，也許是，相比想做本書，好幾個同學其實係更想來聽故事的。

昨晚Helen 姨姨跟我們分享了不同繪本，除了上堂都有講的《合恩角》另一本我最深刻的是《我的海盗父親》同學仔當然都喜歡《鱷魚的一天》啦。又打搞德慧和Helen, 她要特地OT 到咁夜....! 

題外話，昨天下午也開了一個有趣的會，在一家design education board game 的香港公司, 他們做的事十分之有趣，尤其還會到香港花整個星期跟學生設計遊戲，而啲學生work outcome, 好厲害。呢個要分開post 再講，but really touched me 每次見到有人依然在這地方做這種事。

謝謝同學昨晚「排除萬難」來.
每一個相遇都是很珍貴和很難得的。
期待雪糕車下一斷精彩旅程。

巨浪

現在說永遠已經很傻

我們好像活在巨浪下的人。雖然話，變幻原是永恆，但我覺得本來生在香港這感覺就更強烈，而這幾年還變本加厲了。

有形的無形的都在失去。

今天下午去古洞，之前畫了古洞地圖的base - 街道、房屋、歷史故事、地標性的、學校、社福機構和 木廠、鼓油廠 - 那些盛載了人們一生努力的家庭生意。

今天去探訪那裡的老人家。

很快就收地了，就會變成北大都會乜乜乜。

昨天在課中有同學分享自己長大的屋村也要拆了，所以想寫和畫一個故事把回憶紀錄下來 。 

大家也說到垃圾房工人漂亮的裝飾被清拆的事。

讓我想起那些年我也畫過灣仔垃圾站屋頂的秘密花園，大家都說不可以告訴人，因為那是非法的，是工人們自己收集四周居民丟掉的 植物而建成的一個城中花園。

現在那花園也被清理了。

還有很多很多，每天都好像面對極之多的失去。霓虹街牌、古建築物、野生動物、老店、 朋友....還有龍虎山環境教育中心。

還有每天經過那綠油油的山，都被大型開墾，數百棵數百棵樹倒下來 ，變成黃土，然後變成玻璃高樓，那些以前都是綠色的山  "In the new round of study, we have shortlisted about 255 hectares of "Green Belt" sites with potential for housing development, which can provide 70 000 units."

人們說的方言都在逐漸改變。

而有啲國家好似ukraine 仲可以一夜之間乜都無晒。

--------------------

在我游水的泳池，有人腿都不能走路了，還每朝早在泳池裡圍圈做火車捐山窿；
有個婆婆因為年輕做五金舖一直坐在地上，整隻腳是K 型的，為什麼他不乾脆躺着不動？
壞事每天都在發生，人們還抱着那些故事書重複閱讀不放手；
書店館長說蝕了好多年，但還是想繼續做;
香港的海豚由百多條都剩下四十七條時，她們還每周努力告訴人海豚的故事.... 

還有好多好多... 

--------------------

昨天聽到有同學話寫故事寫到好痛苦，我都經常有呢個感覺㗎！

佢哋話so far 睇咗好多好好嘅書。但去到自己嘅故事就好stuck, 我覺得呢個關乎大家都追求緊寫一個好好好好嘅故事（仲未計畫唔畫到）我哋成日講起自己遇到嘅好書，故事有驚喜、有感動 ，有plot twist. 

大家都想要最最最好（我都會有咁嘅感覺）

但其實都有好多一般嘅書，佢哋平平淡淡，或者唔會喺我哋心目中留下好大嘅印象。

另外有同學咬牙切齒說了兩次，圖書館中怎麼有那麼多醜的書。其實我細個都係咁覺得，我想畫繪本包括因為那 10%超好的，stuck with my  whole life, timelessly good 的，亦都好shocked by 點解有咁多咁差 hahaha (唔係話我就會畫得好好，但我某程度上係因為咁而想畫啲好嘅繪本，那是高中的我，放學就會留在書店同圖書館找繪本.... ）

不過我睇咗24 個同學交嘅第一次功課，大家初步嘅相法都好有趣, 有時唔係最爆嘅故事，讀者讀的時候都會bring their other half of the experience to the book ，好似講憂傷的朋友被困住和她的alternative imagination（每個人都可能有呢個experience) 

好似講屋村童年，係important part of 香港人的故事（大家睇咗都會有感覺） 而且佢細個玩嘅嘢都令大家好驚訝。

不過我自己都會有很強烈的這個感覺 ，好像我畫緊兩個storyboard, 都好擔心佢好平淡好沈悶。

但我覺得因為同學仔大多都係寫緊personal experience, 其實都唔使咁擔心，而且呢個係一個實驗，一份功課，唔係第一次就完美㗎嘛。

---------------

眼睛

親愛的漫山樹木

二月不經不覺又完了，香港雖然沒有漫山櫻花的春天，但細看身邊的樹木們，每年這個時候，都好像穿了一件毛茸茸青綠色的新衣。整片山由很多很多樣子不同的樹木組成，而木棉花也都開始盛開了。

我在荃灣德慧繪本書店的展覽亦差不多來到尾聲，今周六會有最後一個活動，是好多小朋友仔好喜歡的繪本 x 音樂會 - 動物嘉年華，要穿成動物來出席啊。

如果你還未去過德慧這間書店，也可以趁住這星期去，除了星期天每天都開門的，而且窗外是一大片綠油油的山，下面有火車軌，我亦都認識咗好多新朋友，尤其係館長Helen 姨姨，聽佢講咗好多故事好幸福，又發現原來佢都好鍾意動物同埋植物！！

我常常看雲、樹木什至地鐵站都不自覺把他們想像為溫柔的小魔怪，為他們加上眼睛，令我覺得我們不用Night Gardener, 周遭都充滿一隻一隻細眼睛的fluffy haha. 

剛巧今天重讀了谷川俊太郎這首詩，香港的山和樹木對於你來說是什麼呢？投稿到「Dear Tree 親愛的樹」跟大家分享吧。知道Dear Tree 是什麼嗎？是我在2015於facebook 開的一個樹信箱，歡迎香港人寫信給一棵自己深愛的樹木。

山
山是 冬天 穿着 厚厚的毛衣
擁抱着 小熊們
連搖籃曲 也不唱
山是 春天 草發芽 花盛開
癢癢的 癢癢的 山
山嗤嗤地 笑着
山是 夏天 積雨雲的 帽子很好看
山讓我們看到 遠方
讓孩子們 騎在肩膀上
山是冬 秋天
換上色彩鮮豔的服裝
突然變得 很時尚
湖的鏡子裡 映照着臉

檸檬

檸檬花樹下的讀書會

被打大的紫藤、偷偷長大的榕樹

咁多個上環植物故事之中我最鍾意嘅係「盧婆婆的老朋友」係一棵眾人樹呀。

這些都是「上環植物圖書館」地圖中收錄的故事，地圖現在已經印好了！

不時有人過來問，怎樣可以得到這地圖！它就是屬於勇於發問的朋友們了。

「上環植物圖書館」近日每個周末都出現在太平山街，有架車幫植物睇醫生，也有導賞團和植物領養活動。

而我今天也很榮幸為植物圖書館搞一個植物繪本圖書館及讀書會，好似圖書館中的圖書館，選了二十多本跟大自然和植物有關的繪本去跟小朋友共讀，也為他們實地介紹周圍的植物。

這班小朋友除了十分喜愛小草，也十分之喜愛讀書，一本接一本，睇唔停！

也有小草的粉絲專登寫和畫了咭送給小草，我們好開心呢。

我在見山的檸檬樹下講故事，頭頂的花都開了，不時有蜜蜂來採蜜。

周六早上也在這裡上陶瓷課，窗外除了有古建築和老樹，也有阿鬼畫的畫，好靚。今天也去了龍虎山環境教育中心。感覺去到那裡都被漂亮高大的樹木溫柔地包圍。

偷聽到兩個小學妹妹對話

E問H 「有空你最想是做什麼？」

「當然是手帳啦」重複了兩次

「那麼我們今天手寫吧！」

也有喜歡讀實體書，喜歡手寫的小孩子。

——————————————————————————————

樹木以外，社區內也有很多盆栽。

今次植物圖書館來到上環，有機會認識這班plant librarian, 跟他們做工作坊，聽他們的故事，並把故事畫成地圖，感覺從一棵花草一堆盆栽也能夠看見一個社區十年二十年五十年的故事🌳🌟

無論係舊舖的植物故事定係新舖嘅都各有特色:

//盧婆婆：「這棵樹是《眾人樹》印度橡樹，當年摩羅街人一起種的，初初只有一尺高，現在已是大樹，細雨躲在下面開檔也不會沾濕。

當年年輕時，我們把它種在水渠裡，讓它有充足水份。有時候更會把清水倒進水溝裡幫它洗澡。

眾人樹又叫拜神樹、擋煞樹，保佑摩羅街個個平安，一直守護着摩羅街的風水。二三十年來，每天我都會幫它上香。它曾陪伴老街坊在前面空地一起看盂蘭神功戲。可惜日新月異，摩羅街小店都換了很多遍，很久都沒人要辦神功戲了。」

摩羅街衆人樹（橡樹）//

氧份

今日德慧繪本館「芝麻與綠豆」展覽的分享會中，除咗有我自己的分享、仲見到一班好可愛的朋友，而且聽到Helen館長介紹好書。聽繪本故事真係好開心嘅一件事。

我可以一直一直聽落去。

（她除了講故事好聽，唔知大家有無留意到，德慧室內窗外的植物都好靚，真心impressed.） 

做學生都係好開心的事。近日我每個星期六上完堂，都會喺郁鍵食午餐，謙嫂每一次都會問「我真係唔明，點解一個好似你咁，乜嘢都識嘅人都要去上堂」

（我當然唔係乜嘢都識）

佢好可能只係想dull 個圈來讚我，因為佢太好人，個個都讚。

但其實正正就係成日做創作，教班；更加要有返一啲做學生嘅時間，除咗學嘢之外，同同學仔吹水飲咖啡，放空地雕塑、寫作，思考創作這回事，有犯錯和實驗的時間，無目的地創作都係十分之正。

所以同小草一齊去上ceramics 就成為了我每周好期待嘅時光。

小草都好辛苦，話說我過咗一個好chur （好充實的）的一周，見咗好多好多人，做訪問，去咗荃灣兩次，教繪本班，去中學做animal rescue talk, 畫地圖 , 開會，好多會，教地圖班.... 去抽血覆診，還有今天於德慧的sharing 等等等.......

中間仲突發出現了病貓貓.... 

小草亦都陪咗我好多。有四日佢都有份的。

我以前仲病啲，當時養嘅係Rosie，我真心覺得佢係我嘅service dog. （但香港無service dog 呢樣嘢，帶住佢有時係偷偷摸摸，所以好 grateful to 所有歡迎我帶埋小狗去嘅地方）

我嚟緊呢幾個月都仲會咁chur.... 

邊個話freelance 可以工作自由啲 ...

少啲工作天...

跟住我個friend 頭先問「點解你可以咁忙。咁你咪賺好多」

sadly 完全唔係咁。只係我好想可以同每個人花多啲時間，包括我嘅collaboration 對象（唔係自己讚自己，可能係性格問題）好想可以認真認識吓每一個人，就算大家看來values 未必完全一樣，歲數差好遠都好。而認真認識唔會係one off 嘅事。

（呢個都係我2019 年先俾自己嘅大目標 - 再認真啲去聆聽人）

然後絕對無賺好多，long story short, 唔係車錢都蝕埋已經好好 : P 

有時我都會問一啲我好respect 的相近行業成功人士，我嘅工作model 係咪有問題。
例如我有朋友話佢自己想做少啲job - 只係接啲令佢可以發揮或者可以出名嘅job :P 唔好浪費時間喺其他projects :P 

但我每個project 都係自己好鍾意好鍾意的，覺得有意義的。當然有好多好多進步空間啦。

所以我由始至終都覺得自己好幸運。

希望這一年一切都可以做得更好啦。應該可以plan好啲. 

造泥

Every gram is love
 I visited Niko's workshop in Sai Kung today and was so touched 😭😭😭

點解會有人做啲咁嘅嘢。雖然之前都見過她做的東西好多次，在UABB 中環碼頭時，每次經過BeCandle 西貢的店。

你有見過BeCandle 那些泥紅色的蠟燭杯嗎？厚厚實實的，BeCandle 的店介紹這些是西貢泥。當時我有個朋友就Message 我話唔明乜嘢意思係香港/西貢泥。

平日我們做Ceramics 的泥，現在大家都買現成的吧。Niko和她的合檔就四出去香港的construction sites - 地盤，厚着面皮問地盤工人可唔可以俾啲泥佢哋。但啲泥唔係拎返嚟就可以用，仲要篩走一啲沙石，然後灑乾，再加另一啲chemical, 反複試下先知質地夠唔夠黏, 拉唔拉得起... 等等。

不是表面那層泥啊，所以是地盤掘深了的泥會較好。

而且在這個高度發展的香港，平日地盤的泥都是去了堆田區。被視為廢料。

然後全香港不同地方的泥都是不同樣子的！
啟德的、元朗的、西貢的、大嶼山的.... 

有白色、黃色、紅色的..... 
聽說wild clay 在外國也頗普遍，但在香港這個地少人多的地方，大概是不容易的事。

我今天才知道Niko 之前曾經在荷蘭四百年老的Royal Tichelaar Makkum工作。
還有她的studio 極之乾淨，好勁。
小草去到十分之自在，竟然還自己出花園行！又在人家studio 正中間大便了（她平日因為性格害羞，會死忍到返屋企先去厠所，她不是一隻正常的狗來的）

然後，我又帶了一嚿西貢泥回家，感覺every gram is love, 想像下成個過程又香港各處collect 重重的泥，到整個做泥的過程，所以every gram is love, 好期待做點什麼。

送了一本我跟藝想一起造的泥土繪本，她未看 :P 一開始是首歌來的，我估她會喜歡。

When I was just a little clay

I asked my mother

What will I be

Will i be sticky

Will i be strong

here’s what she said to me

漿草

 南大嶼小花園中的冬日暖湯

在這班老一輩種植人口中聽得最多的一句是”we never need to buy anything, we have a group of friends and we only exchange what we grow”

繼上次講過灣仔中心的神秘空中花園和那老太太的故事，今天我就去南大嶼這對超可愛搞笑的德國太太和先生的家。

根據google map由我家去他們家要兩小時，雖然我家隔岸就能見到他們那海岸線。

他們九一年在香港認識，住過東南亞很多地方，但住香港最久、小孩都在這裡出生長大。就在這個山谷中的小屋。

他們的木瓜樹高至二樓露台，起初要在一樓露台採木瓜，後來高至二樓露台。

他們多年前已開始照料大嶼山黃牛水牛。也暫託過很多貓狗。孩子都長大了，但個人都咁有火，對世事咁有感覺是如何做到的。

說到對政策的失望、說到上一隻foster 狗離別還會眼泛淚光。

他們說香港教育是打開個腦，直接spoon d 知識進去，完全沒有獨立思考，我問那當年小孩小學中學，你們想過把她們送回德國嗎？他們異口同聲攦手，爸爸摸著我們這木枱飯枱說，lots of discussion, chats went on here， on this table, 雖然學校如此但在家中也跟她們傾好多

他們還試過抗議女兒學校，要女生冬天穿裙子上學，不能穿褲，校長覺得沒面子，最後她們要轉校。

上次媽媽說到自己多痛恨香港肺炎policy, 說若小孩還小， she can’t guarantee she wouldn’t have murdered them if quarantined together.

我說我都喜歡小孩，她瞪大眼問”really, even though I love my kids, but I much prefer animals”

我超幸運這班有故事、的種植老人個個都很愛我、跟我分享他們的家。送我草苗種籽，還早一天就開始做這兩度全部來自花園的湯和焗咖哩。事實上我以前在日本、在蘇格蘭、在法國都遇過很多這些love me, take me in like I’m their kids 的家庭。

她們前園是自己辛苦terraced的，我們走過一大片咖哩葉，就是今天煲咖哩的材料。

啲人成日以為我係extrovert but i really wouldn't think so, 而我覺得佢哋都係make effort 去請我去, spend their otherwise quiet time with me 的，但我哋相方都好期待這一天。

she thanked me for going all the way, 而我真的很享受去大嶼山和她家的寧靜，我們吃飯一直吃到三點半，中間出去行咗圈，太陽好美麗。整片海都是閃閃發光，連樹木都是閃閃發光的。

每次每次去大嶼山都是開心的。

if you are willing to open your heart, 不用去好遠，在香港都有absolutely beauty of life

回程時，我拿住他們花園掘出來的咖哩葉一大棵，周圍全部人都拎住東涌outlet 的紙袋，好搞笑下。

個湯超級好味，Sorrel, Onion, Sweet potato, Carrot, Swiss chard, Leek, Vegan stock, Olive oil

肚腩

 粉紅色的肚腩和甜蜜的印記

Jess said to me: 「年初一我哋終於可以靜落嚟大掃除，重新再看書架上的這本繪本，除了好想和你一起繼續幻想關於船上貓貓的故事，關於自己的繪本習作，突然間好想把我和虎虎的日常好好記錄，虎虎似乎用減法生活，因為每過一年，他都做少幾件事～」

我說：「Elmo 嗰本都係紀錄貓的日常，無起伏跌宕的」

今朝我碰到她。

年初一食早餐，佢第一句就認真問「做一本繪本要有原因嗎？」

她說上星期的課，跟同學談起這問題，大家都好像覺得要個大的原因咁。

我話可能香港人，平日生活和經濟壓力逼人，覺得乜都要有原因，唔可以做浪費時間嘅事。

「時間咁少，有時間都賺多啲錢啦？」
「日日返工賺埋都未夠交租，點可以do a book for fun呀？」

But if you were to ask me, of course 可以係無原因的。
其實只係做俾自己、當紀錄，當writing therapy, as practice, can all be “reasons” no need next level reasons such as changing the world type.

有同學想寫個故事關於雪糕pours over whole hk, 氹到自己哈哈大笑，又畫得開心，完全無問題。

And if you really wanna be a picturebook writer illustrator for life
Then no reason 創作 is also good
No need every story is your 大作, 又唔係每個故事寫咗畫咗都要出版㗎嘛.

然後，初一，我就花了點時間看我家的小貓小狗。
人人都想偷摸苗苗的粉紅肚肚。我也不例外。

研究指出，哺乳類動物一生的心跳，總次數基本上相同，但心跳越快的，相對壽命越短，例如狗的心跳每分鐘100下，平均壽命約10多年；鯨魚的心跳每分鐘只有15～20下，則可活到80年以上。
貓咪的心跳脈搏為120～180次/分鐘。
佢哋心跳好快。

暑假時我正在湊即將要死亡的力力，嘉寶借了一本叫《壽命圖鑑》的書給我看，我是從那本書學到這知識的。

很多人喜歡笑苗苗的肚腩。
相比其他貓，苗也不算天下最肥。

但他有粉紅色的肚腩。
坐着時，在雙腳間也露出粉紅色，無毛的肚腩。
張張相都被人取笑。
人類就是喜歡取笑貓，因為他們一臉認真，但行為卻很滑稽。

很多人知道他是男生時很驚訝，因為他四隻小手都是粉紅的，無毛的肚腩露出乳頭。
我： 難道男生無乳頭的？

大家記得，為 什 麼 苗 苗 肚 腩 這 樣 子 粉 紅 嗎

他的肚肚本來是長滿白色的毛毛的。
但在三歲左右一次長達七個月的大病，最終要做手術，而貓狗做手術的位置要剃毛。他那次手術後，肚腩的毛就一直沒有長回。

那時我們家上一隻狗Rosie 剛去世, 苗苗跟rosie 比 跟小草親密很多很多，苗苗看似是欺負跛腳無牙的ex-breeder 狗狗Rosie , 但every single night，苗苗都會像愛人一樣依着Rosie 睡，自小就那樣子。

而在Rosie 死去的同一個星期，他就開始痾血尿。正常的UTI ，食藥一兩個星期就會好起來。但他持續七個月那樣子，中間試過天下所有可以試的東西。

雖然痾血尿好似好小事（？）咁，但其實他會因為不適而大叫，半夜也大叫，大家都身心俱疲。

然後病情過了七個月有變，就要動手術。

醫生後來見這隻貓貓無毛的肚肚，就會說他是stress licking，所以毛才會一直不長回的。

或者是他對Rosie 的愛的印記來的。

想起以上的故事, 都係因為跟jess 和elmo 的對話。

Jess 香蕉蛋糕的故事才是最感動的。
下次有機會分享。

昨天陽光灑落我的臉，我想起某些這些年來，因為當動物義工而救過的貓狗。
那些偉大的foster parents, 因為他們願意抵受離別的傷痛，給動物第二次機會。

有些我們以為無得救嘅貓狗，為他們找palliative care home, 只為讓他們可以在繁殖場的籠中一生後，有曬曬太陽，訓訓軟床的機會，但他們有些卻捱過來，到現在一直活着。

還有想起。很多很多還在受苦、捱冷捱餓，每天都髒着痕着生活的小動物。

這個十分之唔初一嘅故事。

Happy Year of Rabbit.