黃竹

現在正在畫黃竹坑地圖。 
我好鍾意南區嘅故事㗎，南區嘅地圖之前畫過薄扶林、赤柱、舂坎角同埋香港仔，同埋由堅尼地城係差唔多可以沿海行到赤柱，經過三個泳棚，天光墟，瀑布小徑，和好多魚的海灣，好開心的。

看黃竹坑街坊嘅兒時回憶，好多人小時候都會去那個大泳池，又會偷偷入去。
你有看過以前未起香港仔隧道時，臨入隧道那片地全是農地的舊相嗎？其實也不是很久之前。
還有黃竹坑以前真的是一條坑/河，全部都係船，滿晒。
1966 年的航空照可以看到黃竹坑工業區未填海前塞滿船仔艇仔。

Steph 和Sheren 早前已經在黃竹坑做了oral history 的workshop, 啲街坊嘅故事都好sweet 好有趣。

「盛德以前既老闆係出面做小販，後尾攞左呢個位做食堂。
以前都係多士，咖啡奶茶。一逢早餐，午餐時間就好多工廠既人落黎食飯。
我地啲價錢都係偏平，工廠價，因為啲工人一日三餐，早餐，中午，下午茶都係度食，我地都儘量平啲比佢地。

我係黃竹坑邨長大，我企做大排檔，細個都要幫手。細個係屋邨入面推車仔檔，主要做朝早小朋友放學個段時間，做到七八點賣曬啲野就收檔，賣魚蛋，豬舌，我呀媽就賣椰汁，糯米飯，兩檔打對面。

我地周圍推，有時呀公會推去泳池，啲小朋友游完水就會黎買，有時會去四座街市個邊。阿公屋企大啲，會開曬啲野係屋企預備。其實大部分檔仔都係街坊自己開返，我地樓上樓下都有幾檔。隔離有啲炒腸粉，炒麵，啲檔主而家都好大年紀。成條街好多野食，真係可以唔洗食飯都得。新年仲犀利，成條街都係檔，有啲賣衫，有啲賣二手野，自己整小食。

以前啲鄰舍關係好好，大家都打開門，有時煮左啲咩又會攞埋去隔離分比其他人食。細個會係走廊踩單車，周圍玩。

以前有印刷，廢紙，運輸，好熱鬧。九十年代啲廠開始北移。

而家住華富邨，都係南區。行過識唔識都會照打招呼，慣左。南區住既人好少會走，搬左出去都總係會走返返黎，幾代都係咁，可能覺得南區純樸啲，無咁複雜。

放學個個呀媽企係門口同其他師奶傾計，講到夠鐘煮飯都仲講緊，一係就成煲湯攞埋去隔離，一係就係門口燒野食，條走廊好大，成班細路一路食一路踩單車，打羽毛球，唔會有人捉，真係好開心。而家食堂有時都會撞返啲舊街坊，不過好多都上左年紀，我呢個年紀就少。」